Cerita Puputan Badung Aksara Bali

tut balance
December 06, 2021

Cerita puputan badung dalam Aksara Bali dan Artinya

Cerita puputan Badung dalam Aksara Bali

ᬧᬸᬧᬸᬢᬦ᭄ᬩᬤᬸᬂ᭟

᭚ᬦᬸᬚᬸᬢᬗ᭄ᬕᬮ᭄᭞᭒᭐᭞ᬲᭂᬧ᭄ᬢᬾᬫ᭄ᬩᭂᬃ᭞᭑᭙᭐᭔᭞ᬓᬧᬮ᭄ᬰ᭄ᬭᬷᬓᭀᬫᬮᬓᬫ᭄ᬧᬶᬄᬤᬶᬧᬲᬶᬲᬶᬤᬾᬰ ᬲᬦᬸᬭᬾ᭞ ᬕᭂᬮᬄᬯ᭄ᬯᭀᬂᬘᬶᬦᬳᬸᬮᬶᬤᬶᬓᬮᬶᬫᬦ᭄ᬢᬦ᭄᭟​ᬓᬧᬮ᭄ᬳᭂᬦ᭄ᬢᭀᬧᬸᬬᬸᬂ᭟​ᬤᬶᬲᬸᬩᬦᬾᬫᬍᬢᬦ᭄ᬳᬢᬶᬩᬦ᭄᭞​ᬲᬕᬾᬢ᭄ᬳᬤᬢᭂᬓᬳᬸᬢᬸᬲᬦ᭄ᬧᬫ᭄ᬭᬶᬦ᭄ᬢᬄ ᬩ᭄ᬮᬦ᭄ᬤᬳᬸᬮᬶᬩᬢᬯᬶᬫᬵᬤᬦ᭄ ᭞​ᬏᬧ᭄᭞​ᬅ᭞​ᬮᬶᬧ᭄ᬭᬶᬂ᭞​ᬢᬗ᭄ᬓᬶᬮ᭄ᬭᬶᬂᬳᬶᬤᬭᬚᬩᬤᬸᬂ᭟​ᬳᬦᬾᬜᭂᬦᭂᬂᬭᬚᬤᬶᬩᬤᬸᬂ᭞​ᬫᬩᬶᬲᭂᬓᬳᬶᬤᬘᭀᬓᭀᬃᬤᬗᬸᬭᬄ ᬅᬕᬸᬂᬧᬫᭂᬘᬸᬢᬦ᭄᭞​ᬫᬶᬯᬄᬳᬶᬤᬘᭀᬓᭀᬃᬤᬕᭂᬟᬾᬗᬸᬭᬄ ᬤᬾᬦ᭄ᬧᬲᬃ᭟​ᬳᬶᬳᬸᬢᬸᬲᬦ᭄ᬩ᭄ᬮᬦ᭄ᬤᬦᬸᬦᬲ᭄ᬭᬶᬂᬳᬶᬤ ᬘᭀᬓᭀᬃᬤ ᬳᬧᬂᬳᬶᬤᬦᬯᬸᬃᬧ᭄ᬭᬩᬾᬬ᭞᭓᭖᭐᭐᭞​ᬭᬶᬗ᭄ᬕᬶᬢ᭄᭞​ᬤᬾᬦᬶᬂᬧᬜ᭄ᬚᬓ᭄ᬳᬶᬤᬦᬾᬤᬶᬲᬦᬸᬃ ᬓᬤᬮᬶᬄ ᬗ᭄ᬭᬫ᭄ᬧᬲ᭄ᬩᬭᬂᬩᬭᬂᬓᬧᬮ᭄ᬰ᭄ᬭᬶᬓᭀᬫᬮᬦᬾ ᬓᬫ᭄ᬧᬶᬄᬤᬶᬢᬸ᭟​

ᬧᬶᬦᬸᬦᬲ᭄ᬩ᭄ᬮᬦ᭄ᬤᬦᬾᬳᭂᬦ᭄ᬢᭀ ᬓᬢᬸᬮᬓ᭄ᬳᬦ᭄ᬢᬸᬓ᭄ᬳᬶᬤᬘᭀᬓᭀᬃᬤ᭟​ᬓ᭄ᬭᬡᬓᬯᬸᬮᬦ᭄ᬳᬶᬤᬦᬾᬤᬶᬲᬦᬸᬃ᭞​ᬢᬸᬲᬶᬂᬳᬤᬗ᭄ᬭᬫ᭄ᬧᬲ᭄ᬩᬭᬂᬩᬭᬂᬓᬧᬮ᭄᭟​ᬳᬶᬳᬸᬢᬸᬲᬦ᭄ᬩ᭄ᬮᬦ᭄ᬤᬩ᭄ᬭᬦ᭄ᬢᬶᬮᬦ᭄ᬢᬲ᭄ᬩᬸᬤᬮ᭄᭟​ᬓᬩᬯᭀᬲ᭄ᬳᬦ᭄ᬢᬸᬓ᭄ᬳᬶᬤᬘᭀᬓᭀᬃᬤ᭞​ᬳᬶᬩ᭄ᬮᬦ᭄ᬤᬗᬮᬶᬄᬤᬮᬶᬄᬤᭀᬕᬾᬦ᭄᭟​ᬤᬾᬦᬶᬂᬓᬾᬢᭀᬳᬶᬤᬘᭀᬓᭀᬃᬤᬓᬮᬶᬄ᭞​ᬲᬸᬩᬳᬶᬕᬸᬫ᭄ᬩᭂᬩᬯᭀᬲ᭄᭞​ᬮᬓᬃᬦᬦ᭄ᬤᬗᬶᬦ᭄ᬳᬶᬩ᭄ᬮᬦ᭄ᬤ᭞​ᬤ᭄ᬬᬲ᭄ᬢᬸᬦ᭄ᬧᬘᬂᬍᬩᬸᬃᬤᬶᬧᬸᬧᬸᬢᬦ᭄᭟​

ᬩᬸᬯᬶᬦ᭄ᬧᬶᬤᬦ᭄ᬦᬾᬲᬕᬾᬢ᭄ᬢᭂᬓ ᬓᬧᬮ᭄ᬧᭂᬭᬂᬩ᭄ᬮᬦ᭄ᬤ᭞​ᬲᬺᬕᭂᬧ᭄ᬲᬳᬲᬜ᭄ᬚᬢ ᬩᭂᬤᬶᬮ᭄ᬫᬸᬯᬄᬫ᭄ᬭᬶᬬᭂᬫ᭄᭟​ᬢᬦ᭄ᬧᬭᬭᬧᬦ᭄ᬲᬕᬾᬢ᭄ᬗᭂᬩᬸᬕ᭄ᬰᬾᬲᬲᬦᬸᬃ᭞​ᬓᬳᬸᬚᬦᬶᬦ᭄ᬩᬵᬦ᭄ᬫᬶᬫᬶᬲ᭄ᬢᭂᬓᭂᬦ᭄ᬫ᭄ᬭᬶᬬᭂᬫ᭄᭟​ᬧᬗᬕᭂᬩᬸᬕ᭄ᬳᬶᬰᬸᬭᬤᬤᬸᬦᬾ ᬢᭂᬓᭂᬤ᭄ᬤᬶᬢᬜ᭄ᬚᬸᬂᬩᬸᬂᬓᬓ᭄᭟​ᬤᬶᬢᬸᬫᬢᭂᬫᬸ ᬢᭂᬓᬾᬦ᭄ᬧ᭄ᬭᬚᬸᬭᬶᬢ᭄ᬩᬤᬸᬗᬾ᭟​ᬤᬶᬢᬸᬲᬶᬬᬢᬾᬭᬫᬾᬕᬢᬶ᭟​ᬩᬸᬯᬶᬦ᭄ᬫᬦᬶᬦ᭄ᬦᬾᬲᬶᬬᬢᬾ ᬤᬶᬓᭂᬲᬶᬫᬦ᭄᭟​ᬢᭂᬭᬸᬲ᭄ᬓᬢᬳᬾᬦ᭄ᬲᬶᬬᬢ᭄ᬫᬸᬯᬄ ᬓᬲᬢ᭄ᬭᬶᬬ᭟​ᬧ᭄ᬭᬚᬸᬭᬶᬢ᭄ᬩᬤᬸᬂᬗᬫᬸᬓ᭄᭟​ᬳᬦᬾᬤᬤᬶᬲᬾᬦᬧᬢᬶ᭞​ᬳᬶᬤᬘᭀᬓᭀᬃᬤᬕᭂᬟᬾᬗᬸᬭᬄ ᬤᬾᬦ᭄ᬧᬲᬃ᭞​ᬓᬳᬶᬭᬶᬂᬩᬵᬦ᭄ᬧᬭᬲᬫᭂᬢᭀᬦ᭄᭞​ᬭᬩᬶᬓᬮᬶᬄᬧᬸᬢ᭄ᬭᬧᬸᬢ᭄ᬭᬶ᭞​ᬧᬸᬗ᭄ᬕᬯᬫᬶᬯᬄᬧᬭᬫᬜ᭄ᬘᬳᬶᬤ ᬘᭀᬓᭀᬃᬤᬫᬓᬳ᭄ᬬᬸᬦᬦ᭄ᬧᬸᬧᬸᬢᬦ᭄᭟​ᬤᬶᬢᬸᬲᬶᬬᬢᬾᬭᬫᬾᬕᬢᬶ᭟​

ᬰᬸᬭᬤᬤᬸᬗᬫᬸᬓ᭄᭞​ᬗᬸᬚᬦᬶᬦ᭄ᬳᬚᬶᬫᬶᬫᬶᬲ᭄᭞​ᬢᬸᬃᬦᬸᬜ᭄ᬚᭂᬮ᭄ᬳᬸᬫᬄᬯ᭄ᬬᬤᬶᬦ᭄ᬧᬸᬭᬶ᭟​ᬓᬮᬤᬶᬢᬸᬳᬶᬤᬘᭀᬓᭀᬃᬤ ᬕᭂᬟᬾᬗᬸᬭᬄᬤᬾᬦ᭄ᬧᬲᬃᬲᬾᬤᬤᬶ ᬧᬧ᭄ᬭᬗᬦ᭄᭟​ᬧᬶᬢᬸᬂᬤᬶᬦᬫᬓᭂᬮᭀᬦ᭄ᬧᭂᬭᬗᬾ ᬤᬶᬲᬢ᭄ᬭᬶᬬ᭟​ᬩᬸᬯᬶᬦ᭄ᬫᬦᬶᬦ᭄ᬦᬾᬰᬸᬭᬤᬤᬸ ᬩ᭄ᬮᬦ᭄ᬤᬦᬾᬗᬸᬳᬸᬕ᭄ᬧᬫᭂᬘᬸᬢᬦᬾ᭞​ᬓᬕᭂᬩᬸᬕ᭄ᬳᬸᬮᬶᬓᬗᬶᬦ᭄ᬫᬸᬯᬄ ᬳᬸᬮᬶᬓᭂᬮᭀᬤ᭄᭟​ᬤᬶᬢᬸᬲᬸᬩᬫᬘᬤᬂ ᬧ᭄ᬭᬚᬸᬭᬶᬢ᭄ᬩᬤᬸᬗᬾᬦᬗ᭄ᬕᬧᬶᬦ᭄᭟​ᬳᬦᬾᬤᬤᬶᬲᬾᬦᬧᬢᬶ ᬳᬶᬤᬘᭀᬓᭀᬃᬤᬗᬸᬭᬄ ᬧᬫᭂᬘᬸᬢᬦ᭄᭞​ᬓᬳᬶᬭᬶᬂᬳᬦ᭄ᬢᬸᬓ᭄ᬧ᭄ᬭᬫᬶᬲ᭄ᬯᬭᬷ᭞​ᬧᬭᬲᭂᬫᭂᬢᭀᬦ᭄᭞​ᬧᬭᬧᬸᬗ᭄ᬕᬯᬫᬸᬯᬄᬧᬭᬧᬜ᭄ᬘ᭟​ᬳᬶᬤᬫᬧᬓᬳ᭄ᬬᬸᬦ᭄ᬧᬘᬂ ᬧᬸᬧᬸᬢᬦ᭄ᬤᬶᬧᬧ᭄ᬭᬗᬦ᭄᭟​ᬳᬶᬤᬘᭀᬓᭀᬃᬤ ᬓᬵᬧᬶᬢ᭄ᬳᬦ᭄ᬢᬸᬓ᭄ᬧᬡ᭄ᬟᬶᬢ ᬓᬓᬮᬶᬄ᭞​ᬫᬓᬤᬶᬳᬶᬤ ᬧᬤᬡ᭄ᬟᬢᬫᬦ᭄᭞​ᬫᬶᬯᬄᬳᬶᬤᬧᬤᬡ᭄ᬟ ᬢᬮᬕᬲᬓᬶᬂᬕ᭄ᬭᬶᬬᬢᭂᬕᬮ᭄ᬩᬤᬸᬂ᭟​ᬤᬶᬢᬸᬲᬶᬬᬢᬾᬭᬫᬾᬕᬢᬶ᭟​ᬮᬶᬬᬸᬰᬸᬭᬤᬤᬸᬦᬾ ᬫᬢᬶᬫᬶᬯᬄᬧ᭄ᬭᬚᬸᬭᬶᬢᬾ᭟​ᬓᬮᬤᬶᬢᬸᬳᬶᬤ ᬘᭀᬓᭀᬃᬤ᭞​ᬧ᭄ᬭᬫᬾᬲ᭄ᬯᬭᬷ᭞​ᬧᬸᬢ᭄ᬭᬧᬸᬢ᭄ᬭᬶᬫᬶᬯᬄ ᬳᬶᬤᬧ᭄ᬭᬡ᭄ᬟᬓᬮᬶᬄ ᬲᬾᬤᬭᬶᬂᬧᬧ᭄ᬭᬗᬦ᭄᭟​

ᬢᬸᬯᬶᬢᬸᬯᬄ ᬳᬶᬤᬧ᭄ᬭᬯᬶᬭᬲᬫᬶ᭞​ᬗᬸᬓᬸᬳᬂᬓᬲᬢ᭄ᬭᬶᬬᬦ᭄᭟​ᬗᭂᬢᭀᬳᬶᬦ᭄ᬓᬧᬢᬹᬢᬦ᭄᭞​ᬦᬶᬡ᭄ᬟᬶᬳᬶᬦ᭄ᬕᬸᬫᬶ᭟​ᬩᬸᬮᬦ᭄ᬲᬾᬧ᭄ᬢᬾᬫ᭄ᬩᭂᬃ᭞᭑᭙᭐᭖᭞​ᬩᬤᬸᬂᬫᬭᬓᬯᬯᬩᬵᬦ᭄ᬳᬶᬩ᭄ᬮᬦ᭄ᬤ᭟​᭐᭟

Cerita Puputan Badung Huruf Latin

PUPUTAN BADUNG

Nuju tanggal 20 September 1904, kapal Sri Komala kampih disisi Desa Sanure, gelah Wong cina uli di Kalimantan. Kapal ento puyung. Disubane maletan atiban, saget ada teka utusan pamrintah Blanda uli Batawi maadan, F.A Liefrinck tangkil ring Ida Raja Badung. Ane nyeneng raja di Badung, mabiseka Ida Cokorda Ngurah Agung Pamecutan, miwah Ida Cokorda Gede Ngurah Denpasar. I utusan Blanda nunas ring Ida Cokorda apang Ida naur prabeya, 3600 ringgit, dening panjak Idane di Sanur kadalih ngrampas barang -barang Kapal Sri Komalane kampih ditu.

Pinunas Blandane ento katulak antuk Ida Cokorda. Krana kaulan Idane di Sanur, tusing ada ngrampas barang-barang kapal. I utusan Blanda branti lantas budal. Kabaos antuk Ida Cokorda, I Blanda ngalih dalih dogen. Dening keto Ida Cokorda kalih, suba igum bebaos, lakar nandangin I Blanda, diastun pacang lebur dipuputan.

Buin pidanne saget teka kapal perang Blanda, sregep saha sanjata bedil muah mriem. tan pararapan saget ngebug Desa Sanur, kaujanin baan mimis teken mriem. Pangagebug I Suradadune teked di Tanjung Bungkak. Ditu matemu teken Prajurit Badunge. Ditu siyate rame gati. Buin maninne siyate di Kesiman. Terus katahen siyat muah kasatria. Prajurit Badung ngamuk. Ane dadi Senapati, Ida Cokorda Gede Ngurah Denpasar, kairing baan para sameton, rabi kalih putra putri, punggawa miwah para manca Ida Cokorda makahiunan puputan. Ditu siyate rame gati. 

Suradadu ngamuk, ngujanin aji mimis, tur nunjel umah wiadin puri. Kala ditu Ida Cokorda Gede Ngurah Denpasar seda dipaprangan. Pitung dina makelon perange di Satria. Buin maninne suradadu Blandane nguug Pamecutane, kagebug uli kangin muah uli kelod. Ditu suba macadang prajurit Badunge nanggapin. Ane dadi Senapati Ida Cokorda Ngurah Pamecutan, kairing antuk pramisuari, para semeton, para punggawa muah para panca. Ida mapahiun pacang puputan di paprangan. Ida Cokorda kaapit antuk pandita kakalih, makadi Ida Padanda Taman, miwah Ida Padanda Talaga saking Griya Tegal Badung. Ditu siyate rame gati. Liu Suradadune mati miwah prajurite. Kala ditu Ida Cokorda, pramesuari, putra-putri miwah Ida Pranda kalih seda ring paprangan.

Tui tuah Ida Prawira sami, ngukuhang kasatrian. Ngetohin kapatutan, Nindihin gumi. Bulan September 1906, Badung mara kawawa baan I Blanda.